Inapō rā he tūtara kauika i paea e te tai ki Te Moana a Toi. Hakoa te kaha ngana o ngā iwi tūao, kua tae ngā tohorā ki te moutere iti o Whangakopikopiko.
Ao noa te pō, neke atu i te toru tekau mā ono ngā tohorā i pae ki uta, i riro ki tua, ā, kōkiri ana mai te waka o Mataatua whānui ki te awhi.
I te ata tonu nei, i kotahi ai ngā iwi o Ngāti Awa ki te whakarite i ngā karakia mō ērā o ngā tohorā kua riro nei.
I kuhu mai ngā tohorā ki roto i te whanga o Ohiwa, whai ana i te tohorā e māuiui ana, ka tau mai ki ngā wai mitimiti.
Nā te kaha o ngā waka topatopa ka tahuri ngā tohorā ki te moutere iti o Whangakopikopiko, hei tā Wallace Aramoana, he tuatahitanga tēnei.
Kei te ārahi Te Papa Atawhai me te rōpū Project Jonah i ngā whakaritenga mō te whakamānu tohorā, kua whakatau hoki, ka kōrero tahi ngā rōpū nei ki ngā iwi o te rohe nei, mō te tanumia i ngā tohorā kua mate.
