I te pikinga o te tokomaha hunga kāinga kore, kua whai urupare ngā ākonga o Te Kura-ā-Iwi o Whakatupuranga Rua Mano.
Ko ngā tuākana o te kura kua whai wāhi atu ki tētahi kaupapa whakatū punua whare.
Hei tā te kura, he kaupapa hei whakawhanake i ngā pūkenga o ngā tauira, kia pai ai tā rātou kuhu ki te rāngai kāmura.
I hua ake te whakaaro i raro i ngā akoranga a tō rātou kaiako reo Pākeha, o Adrian Leason.
Hei tā te Tumuaki o te kura, tā Tanira Manaia Cooper, ko ngā uauatanga o ngā whānau e noho pōkaikaha ana hei tūāpapa mō te kaupapa.
“Tēnei kaupapa, Te Kōhao a Tūrongo, i ahu mai i te whakaaro o te hunga rawa kore, te hunga kāore e tino whanake ana, ahakoa ngā pēhitanga, ahakoa ngā taumahatanga” te kī a Cooper.
Nā te kaupapa hanga whare nei, i pūmau ake ai ngā pūkenga o ngā tauira. He kaupapa ka rere i te roanga o te tau.
Nā Rona Arahanga-Ruri tōna anō whare i waihanga, ā, nāna anō i whakatū.
Hei tāna, kua nui kē ake ngā hua, i tua atu i te hanga whare.
“I ako mātou me pēhea te mahi tahi. Me pēhea hoki te hanga i tētahi mea mai i te tīmatanga ki te mutunga.”
“I ako hoki mātou ki te whakawhanaunga ki a mātou anō, ngā tuākana me ngā teina” te kī a Arahanga-Ruri.
He kaha nō ngā tauira ki te kimi āwhina ki te whakatū i ō rātou whare.
I toro atu rātou ki ngā kamupene nui kia kohaina he rawa e pai ai tā rātou whakatū whare, ko ētahi taputapu i tukuna e tētahi kamupene i Kaikohe rā anō
“Nā tēnei kaupapa i tino akiaki i ngā tuākana, i ngā tauira kia tae mai ki te kura, ki te ako me te mahi i ngā mahi, me te hanga whare. I te mutunga o te tau, e taea ana ngā tauira ki te hari i o rātou whare ki te kāinga” ko te kī a Arahanga-Ruri.
E hīkaka ana ētahi o ngā tauira ki te hoki atu ki ngā mahi kāmura, ā, kua whakaritea kia tekau mā rua ngā whare ka whakatūria i tēnei tau.
