Kua rima tau ināianei i te tukinga whakamutunga ki waenga i te kapa NZ Barbarians me te kapa Ōpango Māori, engari hei āpōpō ka tuki rae ki te rae anō ēnei kapa o Aotearoa.
E whai atu ana te kapa Māori i tā rātou wikitōria rua tekau karapīpiti engari i reira hoki te manako o te kapa Babas hei te pō āpōpō.
Ahakoa te poto o te wā hei kapa, kua rite te kapa Barbarians mō te pakanga.
Engari he wairua mōrearea i te kapa mō te mātakitaki atu i te haka o te kapa Ōpango Māori me te kore whakautu.
He hītori mananui to te kapa Babas i Aotearoa nei, kua roa nei tēnei kapa e whāngai ana i te kapa Ōpango ki ngā kaitākaro.
Ā, he tukinga anō pea tēnei mō ēnei kaitākaro kia whai wāhi atu ki te kapa Ōpango mō te īpu o te ao i tēnei tau.
I a te kapa Babas e whakaaro ana ki ērā whāinga, ko te aronga o te kapa Ōpango Māori kia tiakina tā rātou tatauranga hinganga kore o nga tau tata nei me te whakamana i o rātou hoa tākaro, whānau anō hoki.
Kua pakari ake hoki tēnei kapa i tēnei wiki nā tā rātou whakamātautau tuatahi i tērā wiki.
Kāhore e kore, pērā i tērā wiki me ngā tukinga i mua, ka puta mai te ihi, te wehi me te mana o tēnei kapa.