Hei tā te kaikōrero mo Tuhoe hei tā Tamati Kruger ka huri a Ngāi Tūhoe ki te whiriwhiri kōrero mō te whakarerekētanga o ngā tikanga o runga marae mo te reanga a āpōpō. Koira tāna ki te rau tau o Papakainga Marae ki roto o Ruatoki.
Hei ki tā Tamati Kruger, “Ko te whakaaro na, me noho te hapū me ētahi atu o ngā marae o Tuhoe ki te tirotiro he aha te āhua o ngā marae i roto i ngā kotahi rau tau e tu mai ana. Natemea ko ngā marae o nehe rā, he rerekē te whakaaro.”
Hei ki tā Tamati Kruger ko te whakataiwhenuatanga tētahi o ngā raru kua pā ki te iwi.
“Ko te nuinga o tātou kei ngā tāone e noho ana hokihoki mai ai tātou ki te marae engari he rahi ngā marae inaianei kāre e tino rerekē ake i te hōtera, rīhihia ai mo ngā huritau me ngā huihuinga, engari kua kore i nōhia te marae e te kainga tonu.”
“He kaupapa pai, he aha te marae inaianei? He aha te pā inaianei? I runga i te noho a te tangata nē. Kia tirohia tātou ki te waihanga tētahi pā e noho tika ai ki o tātou wawata ki ō tātou whakaaro, koira ngā kaupapa kei a Ngāi Tuhoe.”
Nā whai ano, ka whakanuia hoki a Tanatana Marae o Tuhoe i tōna huritau kotahi rau ki te whārua o Te Waimana hei te tau ruamano tekau mā iwa.
