He uri nō Ngāti Whakaue, nō Ngāi Tūhoe hoki a Hakaraia Wilson kua kapo anō i tētahi taitara ā motu i te whakataetae NZ Grappler inānahi. He kaimamau e tiro whakarunga ana, e kawe hoki ana i tōna Ao Māori.
Kāore a Hakaraia Wilson i paku raru i tōna reanga waru tekau mā waru kirokaramu, tātua kahurangi i te whakataetae ā motu NZ Grappler i Tāmaki Makaurau. Nā tōna pupuri ki tōna ahurea Māori pea i pērā ai. Hei tāna ka tuku karakia ia kia Tūmātauenga i mua i ōna whawhai "kia piki te ora kia piki te māramatanga ki roto i ā au. Ki te kore ka āhua rangirua ōku whakaaro."
Inā hoki te iwi Māori e mahi mamau ana. Hei tā Wilson, he mea tuku iho mai anō, mai anō. "He iwi kaha te iwi Māori. He iwi kaha ā hinengaro, ā tinana. Matatau kē mātau ki ngā āhuatanga o te whawhai."
Kua whai wāhi a Wilson ki tētahi hōpuni whakangūngū i San Diego i ngā marama tata nei, i reira haratau tahi ai i ia ki kaimamau nō tāwāhi. Hei tāna, kāore he tino rerekētanga i tā ngā mahi i kōnei, heoi anō, mō te nuinga i tae atu "koinei tā rātou mahi ia rā, ia rā, ia rā."
Nā whai anō kua pērā hoki ngā whakaaro o Wilson. He hiahia nōnā ki te eke ki ngā taumata ngaio, pēnei ki ngā kamupene i a UFC. Kia tū anō ki te keokeonga o te ao Brazilian Jiu Jitsu me te Mixed Martial Arts anō hoki.
Hei tā te uri whakatipu o te Rotorua nui a Kahumatamomoe e ngākau nui ana ia ki ēnei momo mahi, "ngā mahi atu i tēnei, kāore he aha ki āhau. Koinei tōku tino. Ka oho au ia rā, koinei te whakaaro tuatahi ki roto i tōku hinengaro."
Mā ngā takutaku ki a Tūmatauenga a Hakaraia Wilson e eke ki tāna e hiahia nei.