Kei te kawe a Rob Ruha rāua ko Ria Hall i tā rātau whakaaturanga Behind The Lines ki te motu whānui. I kōrero mai a Rob Ruha e pā ana ki te tito waiata reo Māori.
“Ki auwa nei ko aua mea rā, koinā te kākahu e kīia ana ko au a Ngāti Porou ko au a Hikurangi maunga ko au a Apanui ko au a Raukōkore awa wērā momo āhuatanga, kia kite mai wērā pueru ki runga i a au kua mōhio, ā, nō te Tairāwhiti tērā tamaiti.”
Koia tā Rob Ruha, he waiata i ngā kupu ake o te wā kāenga i tipu iho a ia, ara rā ko ngā kupu pēnei me te 'kalega'.
“Ki te kāenga nei ko te kalega koina tētahi o ngā kupu matua o koneki me ōna whakarerekētanga a kaleg, legaleg, chowlega, churlega, ahakoa te whakamahinga i ahu mai i te whakaaro Māori ko te ka reka tērā.”
Hei tāna he whai i ngā tapuwae o rātau mā kua wehe pērā i a Tuini Ngawai, a Ngoi Pewhairangi, tau iho ai ki ngā kaitito o ēnei rā pērā ki a Rikirangi Gage, a Derek Lardelli rātau ko Kuini Moehau Reedy.
“Kia hau tika ki te puku o te tangata, whakaoreore mai i te wānanga i roto i te tangata, whakamāmā i wētahi āhuatanga pouri o te tangata, wero rānei i te tangata, kia whakaaro pai a ia kia rarata mai ki ngā tangi ki ngā auē o tōna ake iwi, a ko Tuini tērā.”
Hei tā Ruha he tuku iho i te reo kia ora tonu ai i ngā reanga e haere ake nei.
“Kia kite waku tamariki kia kite te ao i te ahureinga o Te Tairāwhiti ake tō mātau reo ake o mātau tikanga ake o mātau whakaaro ake.”
Ka ngahau a Rob Ruha i wāna mahi ki te taha o Ria Hall rātau ko te pēne The Witch Dr i ngā marama e taka mai nei.