He kāhui kāumatua tekau mā rua, kei waenga i te ono tekau ki te waru tekau te pakeke nō Rotorua ka whakataetae i roto i te hui Kaumātua Iron Māori ki Ahuriri āpōpō.
Hei tō Laurie Morrison o te rōpū nei Ōranga Tinana Kaumātua mā te kaupapa āpōpō e whakamoe ana i ngā āmaimai a ngā kaumātua nei mo te whakapakari tinana.
Hei tō Morrison anō “mo ēnei kaumātua, koinei te wā tuatahi ka uru rātou ki roto i te Iron Māori, nō reira i mataku i te tuatahi engari i mea mai mātou ēhē, e tāea koe te hikoi i te toru, rima, kotahi kiromita.”
Neke atu i te toru tekau ngā mema. Tekau mā rua o rātou ka whakataetae ki Ahuriri. Koinei to rātou whakaharatau whakamutunga.
Ki tō Preston Whare, tētahi o ngā kaiwhakahaere o te whare whakapakari tinana nei “he mahana te wairua i te wā ka kuhu mai rātou, e rua ngā wā ia wiki ka hara mai, ā, ka tae mai hoki i ngā wā kāre rātou i te whakaharatau.”
Nā te whakaae a te whare whakapakari, e rua tāra noa te whiu mā ēnei kaumātua.
“Ka whai wā rātou ki te whakaatu ki ngā kaumātua me pēhea te whakamahi i ngā mīhini ka hiki hoki o rātou wairua mutu ana ngā mahi whakaharatau” ki tō Morrison.
Ki Ahuriri okea ai ngā wai, he kauhoe kotahi rau mita, he hikoi, oma rānei, kotahi kiromita te roa e tutuki ai te kaupapa.