E rere kau ana ngā mihimihi me ngā poroporoāki ki te Pā Whakawairua ki a Wally Hayward nō Ngāpuhi, e waru tekau mā whā tau te pakeke.
He pou whakatū i Te Hāhi Māori Kauwhau i Te Rongopai, he Minita hoki i ngā whareherehere a Hayward i mate i te Rāapa, whai muri i tōna pānga ki te roro īkura.
He kaiwhakahaere ia i ngā whare noho o United Māori Missions ki ngā rori o Gillies i ngā tau ono tekau me Owens hei whakangungu ringa rehe i ngā rangatahi Māori tāne, wahine anō hoki e noho tuawhenua ana.
“He tino tangata whakapono i roto i āna tino mahi. Tangata kaha ki te āwhina, kaha ki te haere, tirotiro haere i ngā whānau e raruraru ana, ērā mea katoa,” i mea atu a Hauraki Ngawaka nō Te Rarawa me Te Aupouri.
Mō te taha ki te mau te kupu a Te Atua ki te whakapāho ki a rātou i te kupu.
Otia, i moe tahi ngētehi o āua rangatahi, nō reira, i whakatūria e Hayward mā Te Hāhi Māori Kauwhau i Te Rongopai i te tau ono tekau mā rima hei āhuru mōwai mō ngā whānau hōu.
“He tangata hūmārie,” i kī atu te heamana o Te Hāhi Kauwhau i Te Rongopai a Hone Hemopo.
“E kore e whakahīhī mō tōna tīnana, mō tōna hinengaro, e pīrangi ki te mahi puta mai i Te Rongopai.”
He minita anō hoki ia i ngā whareherehere o Paremoremo me Maungawhau mō ngā tau e toru tekau mā toru.
“Ka haere māua ki te whareherehere, pērā anō ahau, i reira anō hoki ahau, mahi ana i ērā mahi i mua atu i tōna nei haerenga mai hokinga mai ki te Māori Missions,” te korero a Ngawaka.
“He nui ngā tāngata i haere mai ki te karaiti,” i kī atu a Hemopo.
“Kua haere ngā tāngata ki ērā wāhi, he nui te mahi mō rātou katoa i te puta i Te Rongopai i ērā wāhi, ka ora mai.”
Kā whakahaere ngā uhunga ā te tekau karaka i te ata āpōpō, kātahi ka tanumia ki te urupā ki Māngere. Nō reira, kia au te moe e te rangatira, moe mai, moe mai rā.