Kei te kātata atu ki te ekenga ki te kotahi tau nō te karawhiunga a Huripari Kāperieri ki ngā pito o te motu, he waipuke, he waipuke. Ā, ko Ngāti Kahungunu tonu tērā e manaaki ana i te hunga i raru nui ai, ā, e ngaua tonutia ana.
E ono ngā takiwā o Ngāti Kahungunu e horapa ana i Te Tai Rāwhiti, ā e whā o aua rohe i tino pākinohia i te huripari.
Ko Te Wairoa, ko Te Whanganui a Orotu, ko Heretaunga, ko Tamatea ngā whaitua i tino whiua e te huripari, ko ngā rori, ko ngā kāinga, ko ngā wāhi mahi, me ngā whare hiko i waipuketia katoatia. Ko Tangoio Marae hoki tērā, nā te kino o te ua, ko ōna whare i rāoa ki te wai, ki te parakiwai.
E ai ki te Heamana o Ngāti Kahungunu, ki a Bayden Barber, ahakoa kua tata eke ki te kotahi tau, kāre anō kia oti ngā mahi.
“Kei te tārewa tonu, ētahi o ngā mahi kāre anō kia tīmata”
“Ko ngā whānau noho marae, ētahi kātahi anō ka hoki ki ō rātou kāinga, nō reira ko ngā mahi waihanga whare iti hei tāwharau i ērā hunga i a rātou e tatari mai nei ki ērā mahi whakatika whare, koirā tētahi mahi nui, e mahia tonutia ana i Kahungunu. Ko ngā mahi kerikeri i ngā paruparu kua horapa haere nei i te rohe, kei te haere tonu ērā mahi,”
Itāinahi rā, i puta ake ai te kōrero a te kāwanatanga e 63 miriona tāra ka hoatuhia ki Te Tai Rāwhiti me Te Matau a Māui, hei pūtea āwhina i ngā mahi keri paruparu i aua rohe. Ka mutu, e matapae ana ētahi, ka tekau tau te roa o ngā mahi whakapaipai i aua rohe.
E ai ki a Barber, kei te tika te matapae me te nui hoki o ngā mahi kei te haere.
“Arā atu anō te nui o ngā mahi kei te tārewa tonu, ētahi o ngā mahi kāre anō kia tīmata. Nō reira āe, tērā takiwā o te roanga o te wā,”
He tokowaru i aituāhia i te huripari i te rohe o Te Matau a Māui, ā, arā atu anō tētahi kei te ngaro tonu.
Engari e ai ki a Barber, he hua tonu i puta mai i te huripari, ahakoa ngā uauatanga kei ngā pakahiwi o te hunga noho ki reira.
“Mēnā ka oti tika ērā mahi, me pōhiri e te rohenga i te hia mano kaimahi....ki roto ki tēnei rohenga ki te whakamutu ai i ngā mahi. Heoi anō, he wā pea mō tātou te iwi Māori kia uru atu ai ki ērā o ngā mahi, kia whai tūranga mahi ā tātou tamariki mokopuna,”
Hei te Wenerei te iwi o Ngāti Kahungunu ka tuku whakamānawatanga, atu i Te Wairoa tae atu ki Tamatea, mō ērā i riro ki te huripari, mō ngā mahi hoki kua mahia kia whakaora anō ai i te whenua.
0 of 7
