Kei te tokomaha haere te iwi Māori ki roto o Aotearoa.
Nō te ata tonu nei huraina mai ai ngā whika i te tatauranga ā-motu mō te tau 2023, ki Rotorua, ā, e 978,246 te tokomaha o ngāi Māori ki roto o Aotearoa, i te tau 2018; e 869,850 tōna tokomaha, he pikinga 12.5 ōrau tērā i roto i ngā tau e ono kua mahue ki muri.
Kotahi i te tokorima tāngata i Aotearoa, he Māori, ā, tata ki te kotahi o ngā rangatahi tokotoru kei raro iho i te rua tekau mā rima tau te pakeke, he Māori.
E ai ki a Te Mauri Kingi o Te Arawa, he mea nui kia whai whakaaro nui tātou ki ā tātou rangatahi.
“Kāore i tino kite i te āhua Māori, i te ngākau reka, ki te reka mai o te rangatahi ki wēnei whakaaro, ka tahi. Ka rua, ko te whakaaro nui, māmā noa iho ka whakamahi te rangatahi i te īpapa ka tuku katoa i tāna kōrero ki reira.”
“Ko te mea kē kia whakaritea mai ko ngā iwi e hopu ai i ngā kōrero e mōhio ai ngā iwi kei te pēhea āna rangatahi.”
Kei te rongo tonu te Māori i te hē mai nei o te tatauranga 2018
I te tau 2018, e 68 ōrau noa iho o Ngāi Māori i tahuri mai ki te tatauranga, ā, i reira kite mai ai te nui o ngā hē i tā Tatauranga Aotearoa whai i ngā whika o te iwi Māori.
Nō reira, i tērā tau, i ngana a Tatauranga Aotearoa ki te whakatōpū katoa i ngā raraunga Māori ki te wāhi kotahi, arā, ki te pūnaha rorohiko o Te Whata.
Hei tā Rāhui Papa, heamana takirua o te Kāhui Raraunga, he mea nui tēnei e kitea mai ai nga whika katoa o te ao Māori ki te wāhi kotahi.
“He whakahirahira teenei raa. Kua roa e tuumanakotia ana te whakaputa a ngaa tatauranga Maaori.”
“Ahakoa te whaanui i teenei raa, ko ngaa whakanikoniko me ngaa whakanakonako kei te haere tonu mai i roto i ngaa marama.”
“Engari e whakamiiharo ana kua puta i a Maaori aana koorero tuatahi, karekau nei e here nei ki te Kaawanatanga, ahakoa te mana oorite ki a Tatauranga Aotearoa, kua puta i a Maaori aana koorero.”