Ko ngā toa whakaihuwaka o te motu tērā e kōkiri atu ana ki te puna ngāhuru.
Nā, ko Te Waka Huia tonu tērā tētahi tino kapa e arohaina nei e te mata tini, e te mata mano, ā, ka tae ake rā ki te whatārangi a Tānerore, a Hineteiwaiwa ki te whakatūturuhia te tino take i toa ai rātou i Rotorua, ā, ka whiwhi hoki i te taonga nui taioreore, te Duncan McIntyre Memorial Trophy.
I tēnei tau, i raro i te korowai atawhai, ārahirahi a Tāpeta rāua ko Annette Wehi, waihoki te manaakitanga a te tohunga kapa haka, a Tākuta Ngāpō Wehi, kei te kaha ake rā te ngana a Te Waka Huia ki te whakairo tō rātou ingoa ki ngā rākau teitei o tēnei whakataetae mana nui nei.
Anei rā a Te Waka Huia me tā rātou poi, He Rite Tonu Te Manu Ki Te Tangata.
