I te wā o Te Aranga i tērā tau, tokorima ngā tāngata i mate i runga i ngā rori o te motu, he tatau nui rawa tērā i roto i ngā tau e toru ki muri.
Ko te whakatūpato nui anō a ngā pirihimana mō Te Aranga nei, e kaha puta ana rātou ki ngā rori, ā, ka noho ki ngā wāhi e rongonuitia ana mō ngā aituā, ka mau haere i a rātou ngā kaitaraiwa nui te tūpono aituā ai.
Kei te rori-matua i te raki o Tāmaki Makaurau rohe ki ngā Ana o Pūhoi ahau, nā kei te kite mai koe pērā anō ki tērā tau kikii ana te rori matua nei i ngā waka e hoki ana ki Te Taitokerau.
Ā, ahakoa kahore i kitea he matenga ki tēnei rori matua i Tāmaki ki Te Reinga i tērā Aranga, nō te wahanga kirihimete kitea mai ai tētahi tino aitua nui i riro ai tētahi whānau takiwhā ki te takiwā o Waipū.
E kore e kore ka āta mātakitaki te hunga hoki ki te kainga i ngā rori mō te āhua ki te rere o ngā waka, mō te āhua hoki ki ngā wāhi e tūpono nui nei ka aituā.
Ko te taraiwa whakamatua kore, tētahi o ngā tino take i aituā ai te tangata i ngā rori i tērā wāhanga o Te Aranga.
Ko Ramari Wiki e whakarite ana i tana haere whā haora te roa mai i Tāmaki Makaurau ki te wā kainga i Mangonuiowae, ā, ka tino mataara ia ki aua kai-taraiwa.
Hei tā Ramari Wiki, "Me pōturi haere koe, nātemea ahakoa he uaua ki te mātakitaki i ērā kaitaraiwa, me maumahara koe mō tō ake hauora."
Ā, ahakoa he rua tekau tau te pakeke, mōhio mārika ana, me tūpato ia i runga i ngā rori.
Ki tā Wiki, "Ina he tino tino kino rawa atu rātou haere ki te taha o te rori wāea mai ki ngā tāngata kia tukuna i ā rātou peretī."
E mea ana ngā pirihimana, ahakoa te taima ka uiuitia te kaitaraiwa, ka whakamātau hoki i tōnā hā mō te waipiro.
Rawa atu ki tēnā, ka whakamātau hoki i te tere o te motoka me te mau tātua tūru.
Tā ngā pirihimana, ko ngā wāhi horerei pēnei i ngā takiwa kei te puku o te ika, te takiwa o Wanaka i Te Waipounamu ētahi o ngā tino wāhi aituā ki ngā rori.
Engari, ka nui hoki te tūpono o te aituā pēnā he nui ngā motokā kei ngā rori.
