E mea ana a Tupua Urlich, he tamaiti atawhai ō mua o Te Tari Tamariki, Rangatahi me o rātau Whānau, me whai wāhi nui atu te Māori ki ngā kaupapa arotake, whakahaere katoa a tērā tari.
Nā wai, nā wai, e taunga ana a Tupua Urlich ki te ao toko i te ora a te Kāwanatanga. Hei tāna, mā ngā whakahaere a tēnei tari, kāhore e kore, ka taka te hunga tai tamariki ki te hē.
E mea ana ia he tini ngā uri Māori kei roto i te ratonga rā, ā, ka toko ake te pātai, he aha te take, horekau kē te Māori e tuku atu ana i te rongoā.
Kua whai tūranga a Urlich ki te Arotake o CYF mō te tūpono ka puta he rautaki pakihi hou mō te ratonga hei te marama o Hakihea. E tūmanako ana ia ka whakapikihia te manaaki i te tamaiti ki te rua tekau mā tahi tau.
Ka mutu, kei te whakahau ia i te iwi ki te ārahi i ngā kaupapa a te ratonga nei. E mea ana ia, me whai wāhi, me whai reo te Māori i roto i ngā kaupapa e pā kau ake ana ki ngā uri Māori o reira.
Nā, ināianei kua maunu ngā here a Te Kāwana i a Urlich ka tekau mā iwa tau. Ahakoa ka kāinga kore ia i ētahi wā, kua whai kainga rua ia i raro i te Dingwall Trust ki te Raki Paewhenua.
Hei tāna hoki me whai ngā tamariki atawhai o te Kāwana i ngā pakeke e tika ana kia tūwhera tika ai ngā tatau o te ao ki a rātou, kia pakari, kia tupu matomato ai rātou i roto i te ao hurihuri.
Ahakoa ngā taimahatanga kua rongo a Urlich, e tūmanako ana ia, ka huri te tai mā roto mai i te arotake hou a te Kāwanantanga.