Ko Tairāwhiti, Taiwhenua, Taiako he hōtaka whakawhiwhi raihana i te Tairāwhiti, e tautoko ana i ngā whānau atu i Matakaoa ki Te Wairoa. Me te aha, he ara hoki mō rātau kia whai mahi, kia hāpai ake hoki i ō rātau hapori ake.
Ko tā Hamiora Huriwai o Ngāti Porou, “Kua roa te hīkoi, ahakoa ngā aupiki me ngā auheke o te wā i tutuki pai ai tēnei Māori ki ngā mahi kua whakatakotoria e te wahine i a REAP kei mua i a mātau o Te Araroa, ā, taku harikoa.”
Ko tā Ani Pahuru-Huriwai, “Tūmeke katoa mātau te kite atu i te tini me te mano o ngā whanaunga kāre tonu wā rātau raihana.
Hei tā te kaiwhakahaere o Tairāwhiti, Taiwhenua, Taiako hei tā Ani Pahuru-Huriwai, he turaki i ngā taiapa e ārai ana i te hunga kei ngā kokoru o Te Tairāwhiti e noho ana.
“Te tīmatanga tae noa ki te mutunga nui te utu āhua rima rau tāra mēnā ka waimarie koe ka pāhi koe i te wā tuatahi. Te haramai i tuawhenua mai i Wharekāhika ki Pōtaka rānei tae noa ki te taone e toru haora te tawhiti Te noho pōhara hoki kei te whakaaro rātau mō te kai mō a rātau tamariki me pēhea te whāngai te whakakākahu rānei i a rātau tamariki kāre i te paku whakaaro ki te raihana”, te kī a Ani Pahuru-Huriwai.
E waru tekau mā waru ngā tāngata i puta i tēnei hōtaka me ngā raihana i ngā taumata rerekē, e āhei ana ki ngā huarahi ki mua.
“Koira te tino hua nē ka puta rātau ki te mahi, ki te kore whai mahi ko ngā māmā ka taea e rātau te awhina i ō rātau kōhanga reo, ngā kura kaupapa hei kawe i ngā tamariki ki ngā kaupapa nui o te kura me ngā kōhanga, ētahi kei te hono atu ki te St. Johns me te rōpū patuahi kei tuawhenua he mea mīharo tērā”, te kī a Ani Pahuru-Huriwai.
E 48 tau te pakeke o Hamiora Huriwai, he kaiāwhina i Te Kōhanga Reo o Hinerupe i Te Araroa.
“Mōhio tonu au ka mīharo tō Nanny a Māmā Merehēni ki ngā mahi o tēnei tāngata kua roa anō nei te wā a Māmā Merehēni e mea ana ki ahau boy boy tiki tō raihana boy, ināianei kua hāpai au i te hāpai kua mahi ahau i te mahi kua tutuki pai au ki ngā hiahia a te kūia rā, me tōku whānau”, te kī a Huriwai.
I te nui o ngā tono, he tohu e whanake tonu atu ai te hōtaka nei ki mua.
