Neke atu i te 400 tāngata i whara i te āwhā me te waipuke nui o Tāmaki Makaurau, ā, e ai ki ngā ratonga o te tari patu ahi, he nui ā rātou mahi ki te āwhina i ngā hapori huri noa i te motu.
E ai ki te Tāhuhu Rangapū Tuarua o te tari Whakaratonga Iwi, ki a Piki Thomas, me mataara ngā hunga katoa o te motu, kei patua te nuinga o te Ika a Maui e te āwhā, e te waipuke.
“He pōhēhē kē tērā a te tangata, kua hipa katoa te āwhā nui, ā, koirā tā tātou i tēnei wā tonu, he tuku karere ki ngā iwi katoa, ahakoa ko wai, ahakoa ki whea kia mōhio ai te katoa i ngā take o te wā.
“Titiro ki roto o Tapuika, te tereina kua makere mai i ngā huarahi o te tereina, kua horowhenua i Tauranga moana, ā, kai te pērā hoki ngā rori i Pare Hauraki, nō reira kai te rongo ēnei takiwā katoa i ngā takawhiu a Tāwhirimātea. Ka aha rā tātou, me noho mataara!”
Hei tā Piki Thomas, kaua te hunga e pōhēhē he pai noa ki te kauhoe i te waipuke, he mōreare ki te tangata, he nui ngā matenga, he kino mo ngā kararehe otirā ki te whenua hoki.
Hei tāna he uaua ānō te āwhina i ngā hunga kua whara, mehemea he nui ngā hunga e waea atu ana ki te ratonga patu ahi, mo te whakahōhā me te whakapōrearea noa i te hunga pukumahi.
“Me tūpato, koinā te mate nui, mehemea e hiahia anō koutou ki te āwhina, kia haere mai tētehi o ō mātou taraka ki te āwhina i a koutou, tēnā me waiho mā ngā hunga e tino raru ana. Kaua e waea mai mo te korero, mo te pahupahu noa iho.
“Engari mo te hunga e tino raru ana, koirā te huarahi. Waea mai ki a mātou i te nama 111 - Mā reira mātou, koutou e āwhina, e manaaki anō hoki”.
