Kotahi mano iwa rau, iwa tekau mā iwa, he tau nui i riro i te Rōpū Reipa te mana kāwanatanga, ā, i kitea hoki te aranga ake o tētahi o ana ihorei Māori a Parekura Horomia. He tangata i uru ki te Whare Pāremata i runga i tōna ake mana, waihoki kua puritia tana tūru o Te Ikaroa-Rāwhiti tae rawa ki tōna matenga.
I tohua a Horomia ki te tūranga Minita Take Māori i te tau rua mano, ā, he rārangi mutunga kore ngā kaupapa whakawhanake i te iwi i kōkiritia e ia, ko Whakaata Māori tētahi.
Heoi, ina ngā piki, ara hoki ngā heke. I te tau rua mano mā wha, i ākina ia kia whakawhiti i te papa tōrangapū i te aranga o te tohe Takutai Moana.
Ahakoa i haehaetia te Rōpū Reipa i ngā kōwhiringa pōti i whai ake, i puta tonu te ihu o Parekura.
Ko Hekia Parata tētahi i kite i tōna whanaunga o Te Tai Rāwhiti i ngā rangi tata nei, he tuahine o rāua kuia.
Kāti ko tōna ake hauora, he pakanga nui ki a Parekura Horomia. I te aranga ake o ngā patai mo ana mate i tērā marama, kāore ia i pirangi whakaputa kōrero. Otirā, i hāngai tōna aro ki pakanga kē atu, arā, ko tērā o te kōwhiringa pōti e kainamu mai nei.
Āe mārika ko ngā taumahatanga i runga i ngā whānau tana aronga nui tae rawa ki te otinga.
Tūturu ki ngā kōrero mōna, he tangata ngākau mahaki e kore e warewaretia.
