He kotahi marama noa nō te pāpāhotanga o ngā pakiwaituhi rongonui a SpongeBob Tarau Porowhā rāua ko Dora Mātātoa i roto i te reo Māori ki runga o Whakaata Māori, ā, huhua ana ngā kōrero o te marea kua puta.
Hei tā Leon Blake, “Te nuinga o ngā kōrero kua tae mai ki ahau, otirā i ngā whānau maha, i ngā mātua maha, he mihi, he kōrero whakamihi te nuinga o ngā kōrero, otirā te katoa.”
Neke atu i te kotahi marama, kua pupuke ake ano te aroha o ngā tamariki ki ngā pakiwaituhi makau, e kōrero Māori ana.
Hei tā Pania Papa, “Ko tētahi kōrero pai kua hoki mai, ko te whai wāhitanga atu o ngā reo ā-iwi ki roto i te hōtaka o SpongeBob me te mārama o te rere o te kōrero a Dora hei whaitanga mā ngā tamariki me o rātou mātua.”
Nā te angitū o ēnei pakiwaituhi, e rere ana ngā whakaaro i waenga i ngā kaihautū a Pania Papa rāua ko Leon Blake ki te hanga pakiwaituhi Māori, he Māori tūturu te horopaki.
Kua tonoa kia whakamāori i ētahi huinga whakaaturanga e toru anō o SpongeBob rāua ko Dora, ā, hei te marama o Whiringa-ā-rangi mōhio ai mēna ka haere tonu ngā mahi.
