Ao ake i te rihainatanga o te kaiārahi o Reipa a David Cunliffe, e aro atu ana te Rōpū Mema Pāremata Māori o Reipa, ki te āta wherawhera i waenganui i a rātou anō, ko wai te tangata tika hei ārahi i a rātau.
E anga atu ana te Mema Pāremata o Te Tai Tokerau a Kelvin Davis ki te ara whakamua mō tōna pāti o Reipa, i te rihainatanga o te kaiārahi, o David Cunliffe inanahi, tūturu, ko te ara tohu i tētahi kaiārahi hōu kei pane mahara.
Kāti ko tā Davis, ko te mea nui ki a ratau ko te Rōpū Māori o Reipa, ka kore a muri e hokia. "Ko te mea nui mā mātou ngā mema Māori kia anga whakamua me te whakaaro kotahi, kia kore ai mātou e tu wehewehe pērā i ngā āhuatanga i pupū ake inā tata nei. Ko te mea nui kia puta ngā kōrero e whakakotahi ana i a mātou me te hunga o Aotearoa."
I kaha nanu te pāti ki te 24% noa iho o te pōti pāti i riro i a ratau i te kōwhiringa matua, manohi anō i kapo i a rātou ngā tūru Māori e ono, o ngā mea e whitu. Kāti, ka hui ngātahi te rōpū Māori o te pāti hei te wiki e heke mai nei, ki te whakatōpū i tō rātou nei tū ki tēnei take mō te ārahitanga.
Ahakoa tōna rihainatanga, kua raua atu anō a David Cunliffe i tōna ingoa ki te pōtae kōwhiringa ingoa kaiārahi, ā, hoki atu, hoki atu, ko Grant Robertson hoki rā kua whakatū anō i tōna ringa.
Kāore a Davis mō te whāki mai ko wai te ingoa pai ki a ia, heoi mōhio pai ana ia, ko wai te hunga ka whakaawe i tōna whakatau.
E matapaetia ana, kei te takiwā o te whā wiki te roa e kimikimi haere ana a Reipa i waenga i a rātau anō tō rātau kaiārahi hōu.