Kua wikitōria te Kapa Ōpango Māori i tā rātou whakamātautau tuarua ki Hapāna i te taiwhanga o Prince Chichibu ki Tokyo inapō.
I oti te haerenga a te kapa i tētahi tukinga pakeke rawa atu, he tino whakataetae engari koirā hoki te matapae o te kapa, i mōhio rātou ka pakari ake a Hapāna.
Ā ngā kaiako me ngā kaiwhakahaere, he rerekē te āhua o tēnei kapa, he wairua mīharo, he wairua Māori mai i ngā akomanga tikanga a te kaumātua a Luke Crawford, tae atu ki te hononga tata o ngā kaitākaro.,
mārakerake ana te kite he tino kapa tēnei.
I whai wāhi anō a Te Kāea ki ngā āhuatanga katoa o te kapa, i whai haere mātou i te kapa i a rātou e whakatā ana, i kōrero mātou ki ngā kaitākaro i a rātou piki me ngā heke, otirā i whakaaetia anō mātou kia uru atu ki te huinga tuku poraka.
Nō reira, ka taea te kii he haerenga angitū tēnei ki runga ki wāhi kē hoki o te papatākaro.
He haurua o te kapa e haere ana ki Singapore, ahakoa kua whakakorengia aua tukinga ki reira, ka whakanuia te whutupōro me te kapa ki tērā whenua o te ao, ā, ko te toenga o te kapa, me au hoki, ka rere atu ki te kāinga a kō ake nei ki te whakatā.
