Kei te tatari tonu a Teina Boyd mehemea ka āhei tonu ia te whakamahi i ōna waewae ki te hīkoi.
I ngā rangi hararei o te Reipa kua hipa nei, i whara kikino te kai-tākaro o mua o te kapa Poirewa Wāhine o Aotearoa i raro iho i te tekau mā iwa tau te pakeke, i tana hūpeke atu ki runga i tōna moenga.
Rere kau ana ngā whakaaro o te ao poirewa ki a ia.
Rua tekau mā waru tau noaiho te pakeke o Teina Boyd, ka whara nei tōna kaki i tōna kainga i Otautahi.
Kei te haere tonu ngā whakamātautau a ngā mātanga tākuta i Otautahi. I te rā nei i puta ngā whakaaro whakanui a te hapori o te ao Poirewa mona.
He kāpene o mua te uri o Te Whānau ā Apanui mō te reanga i raro iho i te tekau mā iwa tau mō Aotearoa, nā kona ka rongonui katoa tōna tūranga i waenga i te ao Poirewa.
Ka tūmeke katoa te iwi whai muri i te whakaputanga o te karere.
Kei te whakapau kaha tona whanau whanui ki te tiaki i a Teina, a, kua hanga hoki rātou i tētahi whārangi kohi moni mā runga Ipurangi "GiveALittle".
Neke atu i te iwa mano tāra ngā pūtea kua kohia e rātou.
I tēnei wā kei te hōhipera o Burwood a Teina, a, ka rere tonu tana tama ki te kite i a ia.
