He wahine kai-tōrangapū tūroa nei, he mātanga toi rongonui hoki ētahi o te hunga i pinea ki ngā tohu hōnore o Aotearoa i Te Whare Kāwanatanga ki Tāmaki Makaurau i te rā nei. He tokorua tēnei e whakamihia nuitia ana mō tō rāua kaha ki te hāpai i ngā kaupapa hei pāinga mō te iwi Māori.
Ko te manu kōpara o Tongariro tēnei e eke nei ki te kāhui kahurangi o te motu.
E whakamānwatia ana ika a whiro tōrangapū o mua mō ngāna mahi i ngā tari karauna me te ao Māori. I nōhia e ia ki rō pāremata mō ngā wāhanga e rima, hei mema hoki o te kāhui minita, e kōkiri ana i ngā kōpaki huhua, whērā i Te Tari Kooti.
“Te minitatanga ērā mea. He wahine whakahaere i ngā kōmiti he wahine whakawātea i a ia anō kia tū hei mema mō ngā poari huri noa,” i kōrero atu te kaumatua o te Kāwana-Tianara, o Te Pirimia, a Piri Sciascia.
Mai i te tau tekau mā rua kua noho a Te Heuheu hei heamana mō Whakaata Māori, hei heamana tuarua hoki mō te poari Māori me te Tarahiti Whakatau Kerēme o tōna iwi o Ngāti Tūwharetoa. Wheoi, hei tā Sciascia, ko tōna tino kaha ko te hūmārire
“E taea e tātou te kite i tōna ihu manea, i tōna kaha ki te whakatakato kaupapa, whakatakato kupu, engari he wā anō ko tāna, he āta whakarongo, he āta titiro, he āta whakaaro me pēhea,” i mea atu ia.
Ko te tohunga ringa rehe ko Fred Graham hoki tērā i whakamanamana mō ngāna mahi toi. He hoa tata nā Te Arikinui Kahurangi Te Ātairangi Kaahu, nāna i para te huarahi o te ao toi Māori mohoa nei.
“Koia tētehi o te rōpū o ngā ringa toi kaha ki te mārena te ao Pākehā ki te ao Māori i roto i te mahi toi, pērā i a Herewini Murupaenga, Cliff Whiting mā, Hirini Moko Meads,” i kī atu te tama a Fred, arā a Brett.
Tokotoru atu ngā taiea Māori ka pinea ki te tohu o te kuini mō ngā mahi ki te ao Māori, toi, mātauranga me te hapori āpōpō.
