He koni ake i te rua mano toru rau ngā akonga nō ngā whare kōhungahunga, kura hoki o te rohe o Franklin i tae a tinana atu ki te Taiwhanga o Eco-Light i Pukekohe, kia whai wāhi atu ki tētahi waiata-ā-ringa, haka hoki i te whakaterenga o te wiki o te Reo Māori.
Hei tā Te Waiariki Peita, “He pārekareka ēnei mahi te tūtaki ki ngā tamariki ka haere mai rātou ki te awhi i a mātou ki te kanikani ki tā mātou taha.”
Ko te kaupapa ako o Mahi Pai e tukua atu ana ki ngā kura me ngā whare kōhungahunga o te rohe o Franklin e te Tarahiti o Te Kōpu. Ko te whainga matua, he whakatenatena i te ako o te reo mā roto mai i ngā mahi ā ringa, waiata whakakoakoa.
E ai ki a Lisa Minhinnick, “E toru ngā tau i haere au ki roto i ngā kura, ki te whakaako i ngā tamariki ngā waiata me ngā aringa me ngā kupu.”
Ki tā Krystal Lee Brown, “Tino harikoa te ngākau ki te kite i ngā tamariki nō wāhi kē atu, tauiwi mai, Māori mai, Pākehā mai ki te waiata i ngā waiata Māori ki te mahi i ngā ā-ringa me te mahi i tēnei mea te sign language i roto i te reo. He mea hou kahore anō kia kitea.”
He mea whakahaere tēnei kaupapa i te Tarahiti o Huarahi rātou ko TE Tarahiti o Te Kōpu Trust. Ka mutu ko ngā taniwha e whakaahua mai nei, kua tapa ki ngā pūmanawa Māori pēnei i te aroha, me te kaitiaki, ā, ko ngā Taniwha tonu ngā kaiako mō ngā akoranga nei
Hei tā Te Waiariki Peita, “He maha rātou kāhore i te mōhio ki te reo, nō reira he pai ki te kite i a rātou e ngana ana ki te kōrero ki te kanikani, ki te menemene hoki he pai ki te kite i a rātou e menemene ana.”
E ai ki a Roimata Minhinnick, “Mai i te āhua ngāwari ki te ako ki te koakoa, e menemene ana ngā tamariki ki te kōrero, ka mōhio tātou he ngāwari tēnei taonga mō te katoa.”
E tūmanako ana te tarahiti o Te Kōpū kia tuku atu i te kaupapa o Mahi Pai ki ngā kura katoa o Aotearoa, me te wawata hoki, kia whakawhanake i ngā akoranga mā roto mai i te hanga pūmanawa tautono, hōtaka pouaka whakaata hoki.