Kīhai te kaunihera Māori o Aotearoa i te kawe i tā rātou take kia hari atu te kāwanatanga ki te kōti teitei kia aukati i te whakaaetanga o te Trans-Pacific Partnership Agreement nā te mea ka kore rātou e toa.
I kōrero a Manu Paul, heamana o te kaunihera, ki tā mātou kaikawe kōrero a Te Kāea na tō rātou kāhui rōia i tohu ki a rātou kia kāua e whai i ta rātou e hiahia ana.
Ka haere tonu te hainatanga mō TPPA i tēnei wiki.
Hēoi, i te marama ki muri i te rite ia kia hari atu i te kāwanatanga ki te kōti hei aukati i a Aotearoa me tā tātau haina i te whakaaetanga nei.
Hei tā Paul, “Roia teitei, a, QC Richard Fowler, nā ka kī mai ia kaore mātou e waimarie nō te mea he wā anō kei te hara mai, kāre waimarie i tēnei wā.”
Ngā nā roia i mea atu ki a ia ka kore rātou e wikitōria ki te hari rātou i tā rātou kēhi ki te kōti teitei, e whakapono ana a Paul ka kite rātou i tētahi ara hei aukati i te TPPA.
E ai ki a Paul, “Kāua au i te whakaae, kāre te kaunihera Māori e whakaae ki ngā tiriti o tā wāhi, nē, kia hara mai ki te tāmi i taku tiriti o Waitangi, koina te raruraru o tēnei. “
Kei te haere a Manu Paul ki Waitangi i tēnei wiki hei āki i te ara ā ture ki waenga i te Māori hei aukati i te TPPA.
Ki tā Paul, “Me whakatakoto te wero ki runga i te tepu, a tōna wā e tika ana kia werohia, tūkuna atu.”
Ka anga whakamutu te hainatanga o te TPPA ki waenga i ngā whenua tekau mā rua hei tēnei Rāpare ki Tāmaki Makaurau.
