E rua ngā kura Māori i tākorohia i te kōwhiringa whakamutunga i te whakataetae MSSRB ki Te Papaiōea. I rongo a Manukura i te kākara o wikitoria i ngā tau ki muri hēoi kua roa te wa a Hato Paora e eke ki tēnei taumata tākaro.
I tae te tini ngerongero ki te papa tākaro o Bill Brown Park ki te tautoko i tā rātou kapa.
ka tae ki te miniti tuawhitu he whana hāmine ka riro ma Manukura kia puta tā rātou ihu toru ki te kore.
Mai i tētahi kirimiti rima mita i te rārangi piro o Hato Paora ka whakawhiti a pourua Atonio Leawere Walker mo te piro tuatahi o te kemu.
Ā kaore he roa ka whai piro a poumuri Sheldon Tairea na runga i ngā mahi nui a ngā poumua kia kōkiri whakamua.
Whitu miniti i mua i te wa whakatā i hamenetia e Hato Paoro na te mahi mōrearea, ka riro ko te kāri kowhai.
Hēoi kaore a Manukura i whai hua. tekau ma toru ki te kore i te wa whakatā.
Ki te wahanga tuarua ka kōke whakamua tonu a Manukura kia whai piro anō a Walker.
Rima tekau ma rua miniti i te kemu i whai a Hato Paoro tā rātou piro tuatahi o te kemu ma te whana hāmine.
Tekau miniti e toi ana i te kemu ka whakawhit i te rārangi piro a Jahnique Whaitiri.
I ngā miniti whakamutunga ka puta te ihu a te topatahi a Kerei Ranginui kia toa whakaihu waka a Manukura i tēnei whakataetae mo ngā tau e rua karapīpiti.
Ko tā te kāpene o Manukura a Wipere Takitimu, "I tēnei wa kei te ahua pouri ngā kare ō roto kua mutu ngā tau i te kura, a hēoi he pai rawa te kite kua rua ngā kura Māori i tēnei o ngā whakataetaehe pai mo ngā tau e whai ake nei."
Ko tā te kāpene o Hato Paora a Nikora Broughton, "Kihai mātou i toa i tēnei ra engari i puku mahi tonu rātou a ka koke whakamua tonu mātou."
Ko tā tēnei o ngā kaitautoko o Hato Paora a Roihana Nuri, "E mihi ana ki tēnei ra hēoi ano e mihi ana ki te whānau whānui o Hato Paora, ki te hapori me te mea hoki e mihi ana ki ngā mātua te hapori anō hoki o Manukura i te mea nei kotahi ai mātou katoa o Manawatu."
Hei ngā wiki e rua e tu mai nei ka tuki atu a Hato Paora ki a Te Aute, ā ka huri te aro o Manukura ki tā rātou whakataetae rīki.