Kei te arahi a Derek Lardelli i ngā pūkenga me ngā tauira o Toihoukura, te kura toi Māori ki Tūranganui a Kiwa, kia whakahou i ngā whakairo o Te Poho o Rāwiri marae.
88 tau te tawhito o ngā whakairo nei arā kua pirau haere i te au o te wā.
Ko tā Derek Lardelli, “Hei matakite mā te katoa, mena ka waiho, ka pirau, ka hinga te whare. Ko tāku, me whakapai, hei matakitenga mā te katoa. He mana nui tō te whare.”
Hei tā Derek Lardelli mā ngā ringa rehe, mā ngā ringa maha o Toihoukura e oti ai te mahi.
“Ko ngā tauira, waimarie rātau kua tae mai rātau i tēnei wā, ā, kua kitea nei ngā mahi kaitā a Ayson rāua ko Makarini te whakatikatika, te whakatike hoki i tēnei whare. Kia tū rangatira mai anō te koroua nei a Rāwiri Te Eke,” te kī a Lardelli.
Nō te tau 1900 whakairotia ai te whare e te tohunga whakairo o Ngāti Porou a Pine Taiapa, me ētahi atu, i te wā o Tā Apirana Ngata, nāna i kōkiri ngā mahi whakaora i ngā whare whakairo o Te Tairāwhiti.
He whakamana i ngā tātai whakapapa tuku iho o Rāwiri Te Eke Tū o te Rangi.
“He mana nui ōna, mai i te tai whakarunga ki te tai whakararo, heke mai ki a ia mai ōna mātua ōna tīpuna, mai te pō rānō, tērā momo mana e rite nei ki tō mātau ariki ōna rā i a Te Kani a Takirau,” te kī a Lardelli.
Heoi tē taea te whakaora i ngā whakairo katoa.
Hei tā Lardelli, “I te mea mēnā ka whakatika i te tekoteko a ka whakahokia ki tōna taumata, kāre i roa ka makere mai anō ngā āhuatanga o te pirau. Me whakamoe te kaupapa, tērā kaupapa o te tekoteko, whakamoe, whakaara mai anō he tekoteko anō hei matakitenga mā te katoa."
“Tama Hikitia ki raro nei, koia ko te kōruru o te whare, kei tōna ūpoko ko tana mokopuna a Te Eke Tū i te Rangi. Eka panuku, eke Tangaroa, haumi e, hui e, taiki e.”
Ko te whainga ia hei te tau hou oti pai ai ngā mahi.