Ka hū a Whakaari, he tai āniwhaniwha, he rū whenua pea ka whai atu. Kei te rite rānei te Kāwanatanga? Ko Ngāi te Rangi kei te whakatuwhera i ō rātou marae hei tari mā Te Rākau Whakamarumaru, engari ko te pae tawhiti kei te whāia tonu kia tata.
E rite ana a Ngāi Te Rangi kei tūpono pā atu ai he aituā.
Ko Reon Tuanau te Pouherenga o Te Rūnanga o Ngāi Te Rangi. Hei tāna, “Tino rite ngā marae kia tuwhera ngā kūaha, ngā tatau mō te hunga kia hiahia hei ngā ahiwina, hei tautoko i roto i ngā urupare.”
Ko te rite a Ngāi Te Rangi, he kaha ake i tōna rite mō te rerenga hinu i te Rena.
“I roto i te urupare, aituā rā i tino kite rātou i te tino wāriu, te tino mana o te tangata whenua kia urumai i roto i te ICC (Incident Command Centre). I te wā i tae mātou kei roto i te ICC tae noa ki te otinga, kua tino kitea ngā hua pai o te mahi tahi i roto i ngā urupare.”
Hei tā Tuanau, me tuku pouaka utanga ki ētahi o ngā marae hei tari nekeneke i te wā o te mate whawhati tata. Ia tari, he pūrere hihiko, he taputapu whakarauora hoki kei roto.
“Inanahi i kōrero ahau ki tētahi o ngā kaimahi o Te Rākau Whakamarumaru, ko tōna kī mai ki ahau ā te tau hōu, me noho anō tātou ki te whakawhitiwhiti kōrero kia whakahua mai, whakatinana mai ngā kōrero e pā ana ki te whakatū mai o ngā rauemi, koteina me kī, kei runga i ngā marae, hei awhina hei tautoko hei whakarite mō ēnei momo aituā.”
Hei tā te Minita Take Rākau Whakamarumaru, tā Peeni Henare, i tēnei wā kahore he mahere ki te whakatū tari ohotata ki ngā marae. Kei te mahi tahi Te Rākau Whakamarumaru o Te Waiariki me ngā mārae ki te whakarite, ki te whakamahere mahi i te wā ka tūpono tū ai he maiki nui. Ko te kaupapa marae nei, he wāhanga o ngā mahi a Te Rākau Whakamarumaru, ia rā, ia rā.
“Kei kōnei mātou ka tuku te rākau aroha ki ngā mōrehu, ngā whanau i noho pani ai, ki ngā mate me te hunga i āwhina, i tautoko i tēnei wā.”
Ko ngā mahi urupare ki te parekura ohotata ki Whakatāne e haere tonu ana, ā e tū kotahi ana ngā iwi o Mātaatua i roto i te aroha.