He waka patu ahi kei tētahi kāinga i Huia Crescent, i te hapori iti o Te Teko i Te Waiariki, ko ngā kaipatu ahi e whawhati ana ki te tinei i a ia.
He kiritata ki te whare kua tuku kōrero mai, engari kaare i hiahia whakaputaina ai tōna ingoa. Hei tāna, “kotahi te whare tō, ko ētahi whare noho iti hoki kua riro ki te ahi.”
I kite rātou i te ahi e muramura mai ana i te takiwā o te whitu karaka i tēnei pō. Hei tā te kiritata, “ko tōku pāpā me taku kaihana i rere atu ki reira ki te whakamataara ake i te hunga e noho ana ki reira, engari tē aro i te tāne i reira. Taro ake, kua hē kē atu te ahi.”
Nāwai rā ka tae atu te waka patu ahi.
Te āhua nei, nā taua tāne i te kāinga te ahi i hika ai hei tahu wahie, rāpihi rānei.
Kaare i te mōhio tokohia ngā tāngata i te papa kāinga rā i te wā o te ahi, engari ko te whakapae ia i tēnei wā, kaare anō tētahi i mau ki te ahi.
He whare pahi hoki kei te papa kāinga nei, ā, ahakoa tōna pātata atu ki te ahi, kaare i mau.
Tōna tokowhā ngā kaipatu ahi e tinei haere ana i te ahi i tēnei wā tonu. E matapaetia ana, he whakatewhanga ka whakahaerehia e rātou.