Kua whakakorea ngā tāke ki runga i ngā hua miraka a Aotearoa ka hokona ki Haina, i te korenga o ngā tāke taupoki mō te hoko paura miraka.
He mea taupua noa ngā tāke taupoki ki runga i ngā hua ahuwhenua, ka mutu, e hāngai ana te tāke nei ki te rahi o ngā hua miraka i te tau kotahi. Ka utaina ngā tāke ki ngā rawa ka eke i te taumata kua whakaritea e Haina.
E ai ki te minita o Te Manatū Aorere e Todd Mclay, i te mātahi o te tau hou Pākehā, ka hiki ngā tāke ki runga i te paura miraka, ka mutu, e toru rau rima tekau miriona tāra ka penapenahia i ia tau.
Kei te takiwā o te tekau ōrau o ngā hua miraka katoa o Aotearoa, e ahu mai ana i ngā pāmu Māori, ā, ko Aotearoa te tino o ngā kaihoko i ngā hua miraka ki Haina, nō reira, ka whai hua te Māori i te whakakorenga o ngā tāke nei.
Kotahi ira whā miriona tana (E waru piriona tāra te nui) o ngā hua miraka o Aotearoa ka hokona ki Haina i ngā tau e toru kua mahue ki muri, tata ki te haurua he paura miraka.
