He kiriata nā Mark 'The Super Samoan' Hunt mō te haka, e horapa ana te kitea i te ipurangi. Tōna kotahi miriona, waru rau mano ngā tāngata kua mātakitaki i te haka, nā te whare whakapakari tinana o Heartbreak Conditioning i Te One Koura, me te kaiwhakaari Games of Thrones a Jason Momoa, hei whakamihi i a Hunt i mua i tāna tukinga UFC ki a Derrick Lewis hei te marama e tū mai nei.
He toa e whakamihia ki te haka i mua i tāna kake atu ki te mura o te pakanga.
Ko tā Cole Smith, Kaiako, Heartbreak Conditioning, he haka kii ana i te kare-ā-roto.
Hei tā Smith e ohorere katoa ana ia i te rongonui o te haka me te kaiwhakaari, Kanaka Maoli hoki a Momoa.
Ko tā Smith, he apataki o Hunt a Momoa nō reira i tonoa ki a ia kia tū tahi me te ope haka.
Ko Mānuka Whakawaha te ingoa o te haka na Tapuna Nepe i tito, e kōrero ana mō te whai a te tangata i ōna moemoeā. He karere e rongo kaha ana te toa taumaha ka tuki atu ki tōna hoariri nō Amerika a Derrick Lewis.
Hei tā Smith, e rite mārika ana a Hunt.
E mea ana a Smith nā te tautoko a te iwi kainga i tika ai tā Hunt waiaro tōmua i tana hokitanga mai ki te wā kainga.
Hei te tekau ma tahi o Pipiri tuki pihi ki te pihi ngā pūru nei.
