Kua whakaawetia te tokomaha e Ngāti Maru ki te Whakataetae Rīki Māori o Taranaki i tū i ēnei rā whakatā ki Manaia nā runga anō i te toahanga i te Whiringa Toa.
He mīharo rawa te tutukinga a te iwi nō te raki o Taranaki he waewae tapū kē rātou ki te tātāwhāinga.
Nā ā rātou piro i kaha kauanuanutia ai tēnei hunga ki tēnei whakataetae.
"E tū hūmarie ana hei kaumātua me te kite anō i ngā rangatahi kua hoki ki te haukāinga," nā Rangi Kake, kaumātua o Ngāti Maru.
Mīharo katoa ko te kaihanga o tēnei whakataetae a Howie Tamati nā runga i te kōunga o ēnei kaitākaro.
"Ka tae mai ētahi me te whakaaro hei te rangi ka rite tātou. Ka kitea e tatou kua whakarite pai a Ngāti Maru," nā Tamati.
Heoi, kāore a Ngāti Maru mō te whakaaro he whakaihu waka kē rātou, i mua i te whiringa toa .
"Hei te mutunga iho kotahi anake te toa ko te iwi Māori tērā," nā Kake.
Kia tahuri ki te Whiringa Toa, nā te kapa o Ngāti Maru i haukerekere i a Ngāruahineranga e rua tekau mā ono ngā tatau ki te kore.
"Miharo katoa tō mātou kapa i runga anō i te whakaaro kātahi anō ka hono tahi mātou," nā Manaia Osborne, kaitākaro o Ngāti Maru.
Ki te whiringa toa o te reanga tuarua, ko Te Ātiawa tērā i tūraki i a Taranaki Tūturu tekau mā toru ki te whā ngā tatau.
"Kua eke katoa tātou. I kitea te ngākau me te wairua o tēnei rohe e tātou," nā Matiu Welch nō te kapa o Te Ātiawa.
Ki te hunga waimarie ki te whai tūranga ki te kapa Māori o Taranaki, ka aro te titiro ināianei ki te whakataetae Māori ā-motu hei tērā marama.