Ko te wahine kaumoana Māori nei, ko Jolene Busby kei te āwhina i te whakaotinga o tētahi waka hourua hōu hei whakamahi mā ngā rangatahi i Te Taitokerau.
“Ko Pahiiti te ingoa o te waka hōu, he waka kaka kōata, e rua tekau mā ono mita te roa,” tāna i whakamārama mai ki Te Ao Māori i tēnei rā.
Ko tāna i āpiti atu, “he waka ka whai pūwhenua hōu, hei whakaako i ngā rangatahi ki ētahi mahinga whakatere waka rerekē pērā i te ‘shunt’, kaua ko ngā mahi tuku iho a te Māori anahe.”
Ko Pahiiti tētahi o ngā waka e whā ka hono atu ki Te Waimirimiri, ka ū ki Pātaua, whakateraki i Whangarei, mō te rā o Waitangi hei te Pēpuere.
Ko Te Waimirimiri te waka hōurua hōu nā Busby i waihanga, ka whakamānuhia i te Hune i tēnei tau.
Ko tana kaupapa, he whakaako i ngā mahi tuku iho a te Māori mō te whakatere waka hourua ki ngā rangatahi. Ka mutu koia te wahine tuatahi o Te Taitokerau ki te ārahi i te hanganga o tētahi waka hourua.
He mokopuna a Busby nā te tohunga whakatere waka, tārai waka Māori hoki, nā Tā Hekenukumai Puhipi i mate i te tau 2019.
Ka mutu, ka nui te whakamihi atu a Busby ki tōna koroua, ki te huhua hoki i whakaako i a ia i roto i ngā tau.
“Ko Pāpā Hek, ko Mohi Kara, ko Emma Sipo, ko Mere Taylor, e tika ana kia mihi atu ki a rātou katoa, nā rātou au i āwhina ki te mahi i ēnei mahi.”
He akomanga te waka
He mea nui ki a ia te tuku tonu i te mātauranga kua tuku iho ki a ia. Tōna rua tekau ngā tamariki kei te whakatere i Te Waimirimiri i tēnei rā tonu.
“Kei Mangungu, i Te Hokianga mātou ko ngā tamariki i tēnei rā. Kei te whakamātautau i a rātou ki ngā āhuatanga o te moana i konei,” hei tāna.
He reanga kura tuatahi, kura takawaenga hoki ngā tamariki, ā, ko ētahi i awhi i te hanganga o Te Waimirimiri, atu i ngā mahi ruruku i te waka, tae atu ki te tuitui i ngā rā.
Tata ki te katoa o Te Waimirimiri, he mea hanga nā te ringaringa. E whakapono ana a Busby, ko ngā kura katoa i ngā taha moana, me whai waka hei akomanga mā ā rātou tamariki.
”Ka kite au i te āhua o ngā tamariki e manawa ū ana ki tēnei kaupapa, ka mahana te ngākau. Rātou e menemene ana, e tū tōrea ana, e poho kererū ana, e ngākau titikaha ana rātou i ēnei waka.”
Hei tāna anō, “ka hoki ki ō rātou mātua ki te wānanga i ngā mahi kua ākona, he tohu ērā e mārama ai au, kei te ara tika mātou e haere ana.”
Hei tēnei ahiahi, ka puta rātou ki te moana ki te kimi kōhatu mauri, hei koha ki te waka hōu, ki a Pahiiti ka whakamānūhia ā tērā marama.