E ai ki a Claudette Hauiti i roto i tētahi tapaetanga korero, he whakatau uaua tēnā mōna ēngari i oti āna whakamārama i reira.
Heoi, e mōhiotia ana i raru nui a Claudette Hauiti i tērā wiki ao ake i te whakapuakitanga i hē tana whakamahi i tana kari nama mema pāremata mā te hoko i ētahi tīkiti waka rererangi ki Ahitereiria.
Nā, ko te mea kē ēhara tēnā i te wā tuatahi kua takahikia e Claudette Hauiti ngā ture whare pāremata, aa, nā whai anō, e pūkanakana mai ana te tārewatanga o te toki.
He tīkiti waka rererangi ki Ahitereiria i te kirihimete nā Claudette Hauiti i uta ki tana kari nama mema pāremata.
Tae noa ki tēnei rā karekau ia, te ratonga whare pāremata rānei mō te whakahua i te whika mō aua tīkiti rā, waihoki, ētahi atu utunga karekau i whakaaetia.
I te marama o Poutu-te-rangi, i whakahokia e Hauiti taua kāri nama, otira kua utua e ia te pūtea i whakamahia hēngia.
Heoi, he kotahi marama whai muri i tēnā ka takahi ano a Claudette Hauiti i ngā ture, i tana tuku tūranga mahi ki tōna hoa rangatira i tōna tari mema pāremata ki Tāmaki Makaurau.
He takahitanga ture tēnā, na wai rā ka mate a Hauiti ki te pana i tana hoa rangatira i te marama o Haratua.
I uru mai a Claudette Hauiti ki te whare pāremata i te marama o Haratua i tērā tau, nō te wehenga o te mema o mua i raru ai hoki, o Aaron Gilmore.