He mahinga ngātahi ki waenga i Te Taura Whiri i te Reo Māori me Countown e āhei ai te kaihoko ki te rongo i te reo Māori i ngā paeutu kaihoko.
He tuatahi i te ao tēnei āheinga a te kiritaki o Countdown ki te tīpako i te reo Māori i ngā paeutu kaihoko, he mihi, he poroāki hoki ka rangona. He hopunga kōrero reo Māori anō ka āpihia atu ki ngā mīhini hei ngā marama tata ake nei.
I ia wiki, neke atu i te toru miriona kaihoko ka haere ki ōna toa, ā, hei tā te Kaiwhakahaere Take Rangatōpū, Haumaru, Tauwhiro hoki o Countdown, hei tā Kiri Hannifin, he ara tēnei e wātea anō ai te reo Māori ki ngā mahi a ngā whānau ka mahia i ia rā, pērā i te hoko kai.
"Katoa tō mātou kapa e tino manawanui nei i te āheinga a te hunga reo Māori ki te whakamutu i ā rātou mahi hoko kai i roto i te reo, i te āheinga hoki mā te whānui me te whāroa o ā mātou toronga, ka āwhina kia whakarauora i te reo, ā, kia whakamahia e ngā whakatipuranga kei te pihi ake."
Kua tekau tau a Countdown e hora nei i ngā tohu reo rua i ōna toa. I tēnei tau, ka kaha ake tērā, ka reo Māori hoki ngā mihi a ngā kaimahi, ā, ka reo Māori ngā ingoa ki runga i ngā pōhā ika katoa.
Ko tā Hannifin anō, he tuku whakamoemiti ki Te Taura Whiri i te Reo Māori i tā rātou tautoko kia whai oranga ai tēnei kaupapa.
