Kei pōhēhē te tangata ko te kāenga tonu ō Ethan Smith ki te Pūaha o Te Uru o Tāmaki Makaurau me he tūnga torore tōna rite.
Kai tua atu i te kotahi rau o ngā torore mai i te Toa Hoko Kai ō Countdown Westgate kua whakarerea e ngā kainoho o tēnei hapori i roto i ngā marama tata nei ki te whenua taurikura o Manutewhau.
“He tino hōhā au ki ngā mema ō tēnei hapori kai te kawe atu ngā torore ki tāwahi ō te mākete,” hei tā te kainoho nei a Ethan Smith kī ai.
![](https://whakaatamaori-teaomaori-prod.web.arc-cdn.net/resizer/v2/Z3JRDNMHAFVKW7NHSCH7K3S4HM.jpg?auth=1b115a5ace795267ef9224e36aa180659460749ceadacd2b5e0d9bb9c3727a44&width=800&height=450)
“Hōhā ahau hoki ki a Countdown nātemea kāre rātou e tino āwangawanga ana, ka takotoria ēnei torore ki roto i te ngahere ki rō awa kāre he raru ki a rātou engari ki au he take nui tēnā,” hei tā Ethan anō.
E ai ki tā tētahi māngai o Countdown kua torutoru noa hoki ngā wā kua kōrero rātou ki a Ethan e pā ana ki tēnei kaupapa, kia tuku anō i tō rātou kaikirimana kohikohi torore ki tōna kāenga tīkina atu i aua torore.
Hei tā tērā anō māngai, e mārama ana mātou ki ngā hōhā o ngā torore kua whakarerea iho, koinā te take kai a mātou he ratonga kohikohi torore ki te whakautu i ngā kino kua uta ki runga i te hapori.
![](https://whakaatamaori-teaomaori-prod.web.arc-cdn.net/resizer/v2/3IUVDYQAV24LIGMXE3EBJOVQVE.jpg?auth=9dfa42a70716c620caa38c632a38a577ed9f914e60b9368704076d6e564ba48c&width=800&height=450)
He pātata te kāenga o te whānau Smith ki a Countdown me Manutewhau. Ia rā ka hīkoi haere te whānau Smith i te katoa o te ngahere ātaahua rirerire rā.
“Māmā noaiho ki au, erangi kāre rātou i tino hiahia ki te whakapai i tēnei take,” hei tā Ethan Smith whāki anō ai.
Heoi, ki tā Countdown, mēnā rānei he mema o te hapori ka tūpono noa ki tētahi anō torore kua whakarerea, ko te āki nui kia torotika atu ki tā rātou rōpū kaikirimana e wātea ana kia tautoko ake, atu i tēnei nama wāea: 0800 40 40 40.
![](https://whakaatamaori-teaomaori-prod.web.arc-cdn.net/resizer/v2/X6TELD2BRYBVNTWTRFEP3TSP4E.jpg?auth=066c14cfc3a773e9ec36c156a38c27199a6ec15df05421a6fcb85f258423d16d&width=800&height=450)
![](https://whakaatamaori-teaomaori-prod.web.arc-cdn.net/resizer/v2/JIL733XICYGC4RSHGDXKRXRROM.jpg?auth=4609980218e0f2fcb7ec2a73158418846759b927f5f44e8b31a5fe2356a88723&width=800&height=800)