E $48.7m te nui o ngā moni hōu kua whakapuakitia e te Minita Whakawhanaketanga Māori e Tama Potaka, ka whakangaoa ki te kaupapa nui o Te Matatini hei te tau 2025, he pūtea tēnei ka tuarihia i roto i ngā tau e toru.
E ai ki te Minita, ki a Tama Potaka, “Ko te whakahirahiratanga o ngā mahi kapa haka ki te iwi Māori he mea nui ki a mātou o te Kāwanatanga.”
“Ina koa mai i te wā o te kaihāpai a Tā Apirana Ngata me te aranga ake o te waiata ā-ringa.”
“Kāore e kore he nui ngā hua ahurea mō Aotearoa whānui ka puta mai i ngā mahi rangatira a Te Matatini.”
E rua pū anō ngā wāhi ka whakapaua ngā moni nei, tuatahi, ki te whakataetae nui o Te Matatini.
Ka whakapaua hoki te moni ki roto i ngā rohe, hei tautoko i te whanaketanga haere o ngā mahi kapa haka ki roto i ngā rohe.
Kua whānui ake te whakataetae ka tū ki Te Kāhui Maunga hei te tau e tū mai nei, e rima tekau mā rima katoa ngā kapa ka tū ki te papa whakatūwaewae ki Ngāmotu.
“E kore tō mātou Kāwanatanga e tuku i ngā kaupapa pēnei kia tārewa rawa kore ana’, te kī a Potaka.
“Ko tā mātou e whai nei, ko te oranga o te ahurea Māori. Ka whakatenatena mārika ahau i te katoa kia rongo i te reka o ngā mahi kapa haka, kia mātakitaki rānei i Te Matatini inā wātea ana.”
He wāriu nui te kapa haka ki roto o Aotearoa. I te tau rua mano rua tekau mā toru, e whitu tekau mano tāngata i haere atu ki te mātakitaki i Te Matatini ki Tāmaki Makaurau, ā, e $22 miriona tāra te nui o te pūtea i whakapaua ki te ōhanga o Tāmaki i taua wā rā.
“Mei kore ake mātou o te Kāwanatanga hou i toha atu i ēnei pūtea ki Te Matatini.”
“Kua mutu kē tā rātau pūtea ā tērā tau i te korenga o te Kāwanatanga o mua ki te whakaroa i te tahua pūtea pēnei me ētahi atu kaupapa. Heoi anō kua whakatikatikangia e mātou ēnei take.”
“Kua tū te haka a Tāne Rore me ngā mahi a Hine Rēhia.”